What is next to ecstasy?

What is next to ecstasy?
Pain.

What is next to pain?
Nothingness.

What is next to nothingness?
Hell.

“And what is next to Hell?” Iss baar Imama khamoshi sey uss ka chehra dekhti rahi.

“What is next to hell?” Salaar ney apna sawal dohraya.

“Tumhey khauff nahi aata?” Salaar ney Imama ko kadre ajeeb andaaz sey poochtey suna.

“Kis Cheez sey?” Salaar hairaan hua.

“Hell sey…. uss jaga sey jis key agey aur kuch bhi nahi hota…sub kuch uss key peechey reh jata hai… maatoob aur makhzoob ho janey key baad baqi kia bachta hai jissey jananey ka tumhey tajasus hai?“- Imama ney qadre afsoos sey kaha.

“Mein tumhari baat samjh nahi saka…. sub kuch merey upar sey guzra hai!” Salaar ney jaisey ailaan kerney wale andaaz mein kaha.

“Fikr maat karo…. aa jaye gi…. aik waqt aye ga…. jub tumhey her cheez samajh mein aa jaye gi, phir tumhari hansi khatam ho jaye gi…. tub tumhey khauff aaney lagey ga… Maut sey bhi or dozaq sey bhi… Allah tumhain sub kuch dikha aur bata dey ga… phir tum kisi sey nahi poocha karo gey, “What is next to ecstasy?” Imama ney bohat rasaniat sey kaha.

– Umera Ahmed (Peer-e-Kamil)